What is RCEF Seeds?

Bago pa magkaroon ng ganitong programa, bumibili ako ng binhi kung kanino lang, kaya hindi sigurado na aani ng mataas - umaani lang ng 85 kaban sa isang ektarya. Noong 2019, ng magsimula ang pamimigay ng dekalidad at libreng binhi ng RCEF, masaya ako, at ang laki ng pasasalamat ko dahil sa umakyat sa 114-123 kaban ang inani ko sa isang ektarya. May pandagdag na din ako sa pangrenta ng makinarya na dapat ay pambili ng binhi.

Dati, nagtatabi pa ako ng pangbinhi ko sa inani ko para gamitin sa susunod na taniman. Mataas na ang 60 kaban sa isang ektarya kung umani. Hanggang sa nasubukan ko ang dekalidad at libreng binhi galing sa RCEF, ang laki ng pagbabago sa ani ko. Umangat na sa 95-110 kaban sa isang ektarya ang ani ko, hindi ko pa kailangang gumastos sa binhi, kaya may pandagdag ako ng ibang gastusin sa bukid.

Nakikipagpalitan ako ng binhi sa mga kamaganak ko para makatipid ng gastos. Naranasan ko'ng umani ng 80 kaban noon sa isang ektarya. Pero noong nagsimula akong makatanggap ng libreng binhi mula sa RCEF, sinamahan ng tamang pag-aalaga, paghahanda sa lupa at pagbibigay ng sapat na abono at patubig, nadagdagan ng 10 kaban ang ani ko.

Naniwala ako na maganda ang bigay na binhi ng RCEF. Dati, inuulit lang namin ang tanim, 'yung binhi nung kakilala kong magsasaka. Nasa 40 kaban lang ang inaani ko. Simula noong ginamit ko 'yung libreng binhi mula RCEF, naglaro na sa 60-90 kaban ang inaani ko [isang ektarya]. Hindi ako nabigo dito.

First Time kong gumamit ng mechanical transplanter at ng barayting NSIC Rc 436. Medyo mahirap sa una dahil naninibago ako. Dapat talaga masigurado na maayos ang land preparation. Akala ko nga hindi na tataas yung pananim ko, pero ngayon, nakikita kong maganda ang tayo nito. Nakatipid ako sa labor at umaasa ako na aabot sa 60 kaban ang aanihin ko sa kalahating ektarya. Sa loob ng 14 days, aani na ako.

Pangalawang beses na akong farmer-cooperator ng PalaySikatan. Noong una 50% lang ang inani ko dahil sa kalamidad, pero sumubok ulit ako. Nito lang yung kalahating ektarya ko umani ng 65 kaban (65/kg), dati kasi umaani lang ako ng 40 kaban dito, tapos nakatipid nga ako sa gastos at bawas pa sa pagtatrabaho sa bukid dahil sa makinarya ang nagtanim.

Dati, sa inani o sa mga kakilala galing yung binhi na gamit ko para gamitin sa susunod na season. Pero noong nagsimula ang RCEF seed program, madalas na akong makatanggap ng libren binhi. Kung dati ay 50-60 (50 kg. ave) kaban lang ang inaani ko sa isang ektarya, nadagdagan ito ng 20-25 kaban, kasi alam ko na mula ito sa mga mapagkakatiwalaang seed producers. Malaki nang tipid ito sa mga gastusin namin sa bukid.

First time kong makatanggap ngayon ng RCEF certified seeds. Madalas ang gamit ko na binhi ay NSIC Rc 222, ngayon gusto ko naman subukan ang NSIC Rc 436. Alam ko na maganda ang bulas ng mga binhi na galing sa PhilRice. Sana umabot sa mahigit 100 kaban ang anihin ko. Balita ko libre ang binhi na ito kaya yung natipid ko idadagdag ko sa pambili ng abono.

Malaking porsyento ng binhi na galing sa RCEF seed program ay maganda ang tubo. Nakabawas po ito sa gastusin ko sa bukid. Ang pinakamababa kong kong ani dati ay 70 kaban sa isang ektarya, ngayon umabot naman sa 90 kaban ang ani ko. Pinandagdag ko naman sa pambili ng abono yung natipid ko sa pambili ng binhi.